Lunes, 02 Marzo 2015 15:41

Jakäwijan kayuk sarnaqataxa

Escrito por

Aymara

Jakäwijan kayuk sarnaqataxa

Ukat mamajan jachatap amuyta; panpachaniw thayjat k’athatipxayata niya arumaxanwa, 21:00 arum pachaxanwa Palcoco sutin markaruw jak’achxapxayäta, ukat yaqhip jaqinakax wisikilita, awyu ukham aparañ munapxitäna. Ukampirus janiw aparapkitanti.

Gabriela Huanca Condori, Ingeniería de Alimentos, Unibol uksan yatxat’iri

2003 maranxa, Bolivia markanx (Guerra del Gas) ukaw utjäna, kuna urunakakanti ukxa janiw sum amtaskti, taypi sata (octubre) phaxsinanwa, nayax kimsaqallqu maraniyatwa, nayax mamajampiw Chijipina Grande, municipio Achacachi uksan jakasiyäta. Mamajax Altu markar sarañatakiw amtäna, kunalaykuti jilanakajaw ukan jakasipxäna, jupanakatakiw manq’añanak apañan sasin säna, jupanakax manq’añanakat pist’atajapxanwa.

Mamajamp nayampix wisikilitatw sarapxayäta, kunalaykuti k’añaskunakax sayantäwinkapki ukak yatipxayäta janiw jaqinakan thakhi jark’antapxatapx yatipkayäti.

8:00 alwa pacharuw utat sartanipxayata, mamajax   ch’uqi, kisu, jawasa ukat ch’uño awayur q’ipina, nayax parillar qunxatataw sarayata. Achacachi municipior purkasinx jaqinakax thakhiruw qalanaka laq’anaka uchantapk uka uñjapta. Mayni chachax maysat jutaskäna ukat jupax utamaruk kutt’axapxam sasin sapxitu, thakhi jark’antirinakax q’ipinak aparapxi, ukhamarakiw jawq’apxi, chachaskpas warmiskpas janiw asxarapkit sasin sapxitäna. Mamajax yaqha thakhinjam Alto markar puriñatak amtäna 11:00 pachaxanwa, mä jawiraruw puripta janiw manqhatap yatipkayäti; mayni waynaw jawir makhatañ yanapt’apxitäna, nayan sapatujas wusujas ch’arananwa mamajan jan llakisiñapatakix janiw yatiykayäti.

Jan uñjat chiqawjanakpun sarapxayäta, ina laq’aki ukhamarak juqhu taypinaka. Nayarux manq’at utxitäna, mamajax jach’a llusq’a thakhir kutt’añ amtxäna, ukat kutt’xasinx mä chiqaruw puripxayäta ukhanx janiw thakhi jark’antirinakax utjkanti ukat ukharuw samart’awayapxta. 13:00 jayp’u pachaxanwa laqampux wali qinay phuqhanwa niyas jalux purxatirpcha. Ukat mayak chhijchhix purxatanïna. Chhijchhix jach’anakanwa, mamajax   awayump naylunampiw awayt’ayitu ukax paninitakix jisk’akinwa. 14:00 jayp’u pachajanwa nanakax thakhin qunt’atakisipktayatwa, mamajax nayarukiw awayt’ayitäna jupax jallump ch’aranasxakinwa, ukat kisump jawas mut’imp churitäna. Pachax makiptxanwa 16:00 jayp’u pachaxanw jallux apjtxanwa.

Ukat thakhinjam sarasipkakiyatw niy Huarinar jak’achasa. Mamajax sapatuj juritap amuyxi. Sapatuj miryasax apsusiyitu ukat kayujat naylunampiw ch’uqantitu. Wisikilitat sarasipkaktwa yaqhip chiqax kayuk ukjamarakiw sarapxayäta. Ukat mamajan jachatap amuyta; panpachaniw thayjat k’athatipxayata niya arumaxanwa, 21:00 arum pachaxanwa Palcoco sutin markaruw jak’achxapxayäta, ukat yaqhip jaqinakax wisikilita, awyu ukham aparañ munapxitäna. Ukampirus janiw aparapkitanti.

Guerra del gas

Ukham ch’amakanx nayax wali qaritaxayätwa ikis walpun purxitäna. Mamajarux kawkaharus qurpachayasxañani sasinw sayäta, jupax sarañ munaskakinwa. Kayux uñxatasta, wali ch’uch’upuninwa ukhamarak ina jullurata. Janiw sarañ munxayäti, kayu ch’akhanakax walpun usxitäna, mamjax q’ipxaruwayxitänwa ukhamaw Cruce Peñas ukhar puripta niy chika arumaxanwa. Ukat k’añaskun lusa qhanap uñjapta: Pallapallan kamyunitapanwa ukaw aptawayxapxitu ukat Ceja de El Alto jak’aruw jaytawayapxitäna. Ukhat kayuk jilanakajax kawkha utankanti ukar sarxapta; wali ch’arana ukatx ina ñiq’impis ch’itiqsuta, pä alwa pacharuw purxapta.

Visto 1126 veces Modificado por última vez en Jueves, 19 Marzo 2015 16:00
La Pública

La Pública es un proyecto que busca crear y gestionar espacios para el ejercicio ciudadano a través de redes sociales y fuera de ellas, articulando para ello el periodismo digital y el activismo.

fb htw hyt h

lp15

 

La Paz - 71597592
Cochabamba - 71786333
Santa Cruz - 71528022

 

cc