Aymara
Bobi sutin anux yatiqañ utaruw nayamp chika sarirïna
Anux nänakamp chikapuniw sariri. Nänakan tatanakajax yatiqañ utarux anumpiw khitapxirïtu, uka anux kimsa maraw nänakamp chika sarirïna.
Victor Hugo Quispe, Ingeniería de Alimentos, Unibol TK jach’a yatiqañ utan yatiqiriwa
Kunapachatï nayrïr kuti yatiqañ utar mantkayäta, yurïw markajax La Paz departamento, provincia Jose Manuel Pando, municipio Santiago de Machaca, Sorabelen ayllun jikxatasi. Utajat yatiqañ utarux 6 km ukch’a sarañankiwa. Kunapachatï suxta maranikayat ukhax tatajax yatiqañ utaruw irpirïtu ukat irpanirikirïtuwa. Kunapachatï tatajax jan irpirïkitu ukhax janiw jaya sarañ munirikti, tataj mamajas nay irpkawix qaritaxiriwa ukat nayax janiw sarirïxti. Mä jawiraw makhataña, kunapachatï jallux purintk ukhax uka jawiran umax jilxatxiriwa, janiw makhatañjamaxirikiti, janiw mä chakas mayskatar makhatañatak utjirikiti.
Yatiqir masinakajampix ukhamaw sarapxirita. Nayanx mä masijaw utjitäna, Juan sutini, jupampiw sapürus yatiqañ utar sarapxirïtxa, ukatx mä anuw utjapxitäna Bobi sutini, uka anux nänakamp chikaw anatas sariri. Nänakax 5:00 jayp’u pachaw yatiqañ utat mistupxirïta, ukat sarañkamax arumäxiriwa: asxarasxapxirïtwa. Anux nänakamp chikapuniw sariri. Nänakan tatanakajax yatiqañ utarux anumpiw khitapxirïtu, uka anux kimsa maraw nänakamp chika sarirïna.
Kunapachatï quinto de primariankxayat ukhax mä misikilit alarakxapxirïtu, ukatx nayax uruw utar purxirïta, janiw arumax puririkxti. Anujax yatitäxasax nayamp chikax saraskakirinwa.
Patatuqinakanx yatichañ utanakax jayanakan jikxatasi, yatichäw katuqañatakix walja pachanakaw kayuk saraña.