Lunes, 11 Enero 2016 13:30

Jakäwija

Escrito por

Uka jakawin jan walt’äwinakax nayatakix mä yatichäwiniwa, kuna jan walt’awis utjapan ukampirus Tatitumpix taqi kunas wakisiriwa.

Aymara

Jakäwija

Uka jakawin jan walt’äwinakax nayatakix mä yatichäwiniwa, kuna jan walt’awis utjapan ukampirus Tatitumpix taqi kunas wakisiriwa.

Guido Callisaya Machicado, Agronomía, UNIBOL “ATK” jach’a yatiqañ utan yatiqiriwa

Kunapachatï 6 maranikayät ukhax mamajax República del Paraguay yatiqañ utaruw qillqayanirïtu, uka yatiqañ utax La Paz markan Plaza San Francisco uksan jikxatasïna, ukax 1998 marananwa, wila masijax zona San José de Yunguyo, El Alto markanw qamasipxäna.

Uka maranakax mamajax La Paz markan Tejar ukat Sagárnaga uksan muxsa achunak aljirïna, tatajax muxsa achunak Alto Beni markatpach apayanirïna. Mamajax 5 willjta pachaw utat qhathupar sarxiri, nayarux jupachikaw irpiritu ukat qhatupat yatiqañ utarux sarxiritxa. Nayax alwat luxu umampiw jariqasiwayirïta, ukat yaqhip pachax kullakajampiw yatiqañ utar sarapxirïta.

Kunapachatï nayax yurkatat ukhatpachaw tatajax jayan jakasitäna, maran pay kutikiw puriniri qullqi mayiñataki. Wila masijax janiw wali qullqinirikiti, ukatw nayax jan recreo uksa uñt’irikti. Kunapachatï tercero de primaria ukankxayat ukhax jisk’a sullkajaw mantxarakïna. Mamajax paniniruw yatiqañ utar khitapxiritu.

Mamajax 1,50 ukhak pasajitak churapxirïtu ukatx janiw recreo ukatakix qullqiniripkti. Utjatx yatiqañ utarux línea 18 ukat 54 uka k’añaskukiw apapxiritu. Yaqhip pachax maq’at awtjatax pasakitakik uka qullqimpix alasxapxiritwa. Ukatx utarux kayukiw kut’awayxapxirïta; sullkajax nayan juchajatx wal t’aqisiri: Amuyapxasmat plaza San Franciscot El Alto markakam kayuk saratanakaxa?

2002 maranx mamajax El Alto markaruw Almirante Miguel Grau yatiqañ utar qillqayxapxitu, UPEA uñkatasinw jikxatasi, pä maraw ukan yatintaskayäta, ukatx Guerra del Gas ukaw utxana, mamajax ukaruw sariri ukampirus niyapuniw usuchjapaxatayna, nayax wal llakisirïta.

2003 mara tukuyax mamajarux presión alta uka usunitaw sasin qullirinakax sapxäna, ukatx 2004 maranx Caranavi markaruw sarxapxta, 2004 – 2005 – 2006 maranakanx nayax zona Villa Yara, Calle 10 uksanw jakasiyäta, Simon Bolivar de Villa Yara yatiqañ utanw yatiqaskayäta. Sexto curso ukankxayätwa ukatx nayax t’anta lurañakis ukanw irnaqayäta, ukatx k’añask apnaqañ yatxarakiyatwa, jilïr jilanakajampix janiw walt’ayasipxirikti kunalaykutix jupanakax janiw yatiqäwinakap tuyapkanti, mayni kullakajaw utjiri jupakiw nayar wal munasiritu.

2007 maranx nayax kullakajampiw Jonh F. Kennedy yatiqañ utankapxayäta ukax plaza de Caranavi uksankanwa, uka maranx enero phaxsinw munat kullakajax k’añaskun usuchjat jiwawayxi. Nayax janiw jiwatapachaw sirïkti, jupax olimpiadas de matemáticas ukanw Caranavi markan atipt’iri. Mamajaw kullkajan jiwatapatx chuymacht’iritu ukatx nayax kullkajamayaw sasinw sarita. Ukampirus nayax jan wali masinakamp uñt’asisax jan wali thakhiruw sarxirita.

Cuartel uksat purinxasinx 2011 maranw aka Universidad Indígena Boliviana Aymara “Tupak Katari” yatiqañ utar amtaj phuqhañatak jutawayxta. Uka marax llakiw utjawayxaraki tatajaw jiwxatayna.

Nayax janiw yatiqäwimp sarantañ munxayati, yaqhip pachax arunak ist’irita, janipuniw armañjamakänti, Caranavit jutxt ukatx janiw uka arunakx ist’xayäti, ukat aka Jach’a yatiqañ utan qhipartxta. Uka jakawin jan walt’äwinakax nayatakix mä yatichäwiniwa, kuna jan walt’awis utjapan ukampirus Tatitumpix taqi kunas wakisiriwa.

Visto 985 veces Modificado por última vez en Martes, 26 Enero 2016 19:14
La Pública

La Pública es un proyecto que busca crear y gestionar espacios para el ejercicio ciudadano a través de redes sociales y fuera de ellas, articulando para ello el periodismo digital y el activismo.

fb htw hyt h

lp15

 

La Paz - 71597592
Cochabamba - 71786333
Santa Cruz - 71528022

 

cc